Gəncədə küçələrin birində sakinləri kommunal məsələ narahat edir. Bu haqda Gencexeber.az-a 29 avqust tarixində məlumat daxil olub.
Söhbət şəhərin Şota Rustaveli küçəsindən gedir. Sakinlərin sözlərinə görə, bir ay öncə ərazidə fərdi yaşayış evlərinə kanalizasiya çəkilib. Lakin işlər tamamlanmayıb. Ərazidə quyulardan biri açıq qalıb və bura çirkab sular dolub.
Nəticədə küçədə antisanitar vəziyyət və kəskin qoxu yaranıb. Bu hal ərazidə yaşayan əhalini narahat edir. Sakinlər bildirirlər ki, dəfələrlə aidiyyəti quruma müraciət olunub. Lakin heç bir nəticə əldə edilməyib.
