Bu gün şəhid Şakir Sadıqov və Ruhlan Əliyevin doğum günüdür.
Şakir Rəşid oğlu Sadıqov 7 sentyabr 1972-ci ildə Gəncədə anadan olub. 27 saylı texniki-peşə məktəbində çilingər ixtisasına yiyələnib.
O, dostu Vüqar Rzayevlə təxminən eyni vaxtda həqiqi hərbi xidmətə çağırılıb. Şakir Rəşid oğlu Sadıqov 17 fevral 1994-cü ildə Göytəpə yüksəkliyində gedən döyüşlərdə Vüqarı xilas edərkən şəhidlik zirvəsinə ucalıb. Şəhidimiz Gəncə şəhər Şəhidlər xiyabanında dəfn olunub.
Ruhlan Novruz oğlu Əliyev 7 sentyabr 1974-cü ildə Zəngibasar rayonunun Zəngilər kəndində anadan olub. O, 1981-ci ildə 1-ci sinfə Zəngilər kənd orta məktəbində gedib. 1988-ci ildə valideynləri ilə birlikdə öz torpaqlarından qovulub. Bu səbəbdən Gəncə şəhərinə köçüb. Ruhlan Gəncədə 19 saylı beynəlmiləl məktəbin rus bölməsində təhsilini davam edib. Gəncə Avtomexanika Texnikumunu bitirib.
O, 1993-cü ildə orduya çağırılıb. Əliyev Ruhlan Novruz oğlu 22 mart 1994-cü ildə Füzuli rayonunun Alıxanlı kəndinin erməni işğalçılarından müdafiə olunması zamanı şəhidlik zirvəsinə yüksəlib.
Şəhidimiz Gəncə şəhər Şəhidlər xiyabanında dəfn olunub.
