Bu gün şəhidlər Vidadi Məmmədov və Səyyar Arazovun doğum günüdür.
Vidadi Nadir oğlu Məmmədov 21 iyul 1966-cı ildə Gəncədə anadan olub. Texniki-peşə məktəbində təhsil alıb. Bir müddət Təyyarə Təmiri Zavodunda çilingər işləyib. Həqiqi hərbi xidməti Arxangelsk vilayətində keçib. Qayıtdıqdan sonra Bakı Dəmirçilik məktəbində oxuyub.
O, 18 mart 1992-ci ildə Kəpəz Rayon Hərbi Komissarlığı tərəfindən səfərbərliyə alınıb. 703 saylı hərbi hissədə tuşlayıcı vəzifəsində xidmət edib.
Vidadi Nadir oğlu Məmmədov 14 iyun 1992-ci ildə Buzluq-Sarısu istiqamətində gedən döyüşdə düşmən gülləsinə tuş gələrək şəhidlik zirvəsinə ucalıb.
Səyyar Güloğlan oğlu Arazov 21 iyul 1987-ci ildə Gəncədə anadan olub. 1994-2003-cü illərdə İnteqrasiya Təlimli İnternat Tipli Gimnaziyada təhsil alıb. 2003-2006-cı illərdə 3 nömrəli Peşə liseyində (indiki Ticarət və Xidmət üzrə Gəncə Dövlət Peşə Təhsil Mərkəzi) oxuyub.
2006-cı ildə həqiqi hərbi xidmətə çağırılıb. Qayıtdıqdan sonra «Semsan» şirkətinin armatur əritmə sexində çalışıb.
Vətən müharibəsi zamanı Səyyar könüllü olaraq ordu sıralarına yazılıb. Murovdağ istiqamətindəki döyüşlərdə iştirak edib. Səyyar Güloğlan oğlu Arazov 30 sentyabr 2020-ci ildə Kəlbəcər rayonu uğrunda gedən döyüşlərdə şəhidlik zirvəsinə yüksəlib. 19 dekabr tarixində isə Gəncə şəhərinin Şəhidlər xiyabanında dəfn olunub.
Şəhidimizin Vətənə əmanət 2 övladı qalıb.
