Bu gün şəhid Şakir Kərimovun, Siyavuş Rüstəmovun, Namiq Həsənovun doğum günüdür.
Şakir Fərman oğlu Kərimov 11 avqust 1965-ci ildə Gəncədə anadan olub, 6 saylı orta məktəbi bitirib. O, 80-ci illərdə Qazaxıstanın Taldı-Kurqan şəhərində hərbi xidmətdə olub. Ulyanovskda Avtomobillərin İstismarı İnstitutunu bitirib. 1988-ci ildə Vətənə qayıdıb və könüllü hərbi xidmətə gedib.
Tağım komandirinin müavini vəzifəsində xidmət edərkən Şakir Fərman oğlu Kərimov 13 fevral 1995-ci ildə Ağdam ətrafında gedən döyüşlərdə şəhidlik zirvəsinə yüksəlib. 2 oğul övladı Vətənə əmanət qalıb.
O, Gəncənin Şəhidlər xiyabanında dəfn edilib.
Siyavuş Qiyas oğlu Rüstəmov 11 avqust 1973-cü ildə Gəncədə anadan olub, 6 saylı orta məktəbi bitirib. 17 yaşından dəmiryol stansiyasında işləməyə başlayıb.
O, 16 aprel 1992-ci ildə hərbi xidmətə çağırılaraq Ağdam şəhərinə göndərilib. Mərzili, Novruzlu, Əhmədabad, Cinli kəndlərinin müdafiəsində, Fərrux dağı uğrunda döyüşlərdə iştirak edib.
Siyavuş Rüstəmov 1993-cü ilin 21 oktyabrında beş nəfər döyüşçü ilə birlikdə Füzuli rayonunun Böyük Bəhmənli kəndi yaxınlığında mühüm postun müdafiəsində dayanıb. Əsgərlərimiz düşmənin T-72 tankı və canlı qüvvəsini məhv edərək, canları bahasına həmin obyekti müdafiə etməyi bacarıblar.
Siyavuş Qiyas oğlu Rüstəmov 21 oktyabr tarixində şəhidlik zirvəsinə yüksəlib, 14 dekabr 1993-ci ildə dəfn olunub. O, «Azərbaycan» ordeni ilə təltif edilib, Gəncədəki küçələrdən biri şəhidimizin adını daşıyır.
Namiq Arif oğlu Həsənov 11 avqust 1977-ci ildə Gəncədə anadan olub. O, 4 nömrəli orta məktəbin 8-ci sinfini bitirdikdən sonra peşə məktəbində elektrik-quraşdırıcı peşəsinə yiyələnib.
2001-ci ildə hərbi xidmətə çağırılıb. Namiq Arif oğlu Həsənov 5 aprel 2003-ci ildə Füzuli rayonu uğrunda gedən döyüşlərdə şəhidlik zirvəsinə yüksəlib.
