Bu gün şəhid Taleh Məmmədovun doğum günüdür.
Taleh İsgəndər oğlu Məmmədov 28 avqust 1968-ci ildə Gəncədə anadan olub. 27 saylı texniki-peşə məktəbini bitirib. O, 1987-1989-cu illərdə Almaniyada həqiqi hərbi xidmətdə olub. Burada döyüşçü atıcı silahların təmiri ustası peşəsinə yiyələnib.
Qayıtdıqdan sonra cihazqayırma zavodunda çilingər işləyib. I Qarabağ müharibəsi zamanı Taleh Məmmədov könüllü olaraq Özünümüdafiə batalyonuna yazılıb. Ağdam rayonunun Pircamal, Abdal-Gülablı kəndləri uğrunda döyüşüb.
Telejurnalist Çingiz Mustafayevin döyüş bölgəsindən çıxarılmasında Talehin böyük xidməti olub. Məmmədov 17 iyul 1992-ci ildə Xocalı rayonunun Naxçıvanik (indiki Naxçıvanlı) kəndi uğrunda gedən döyüşdə iştirak edib.
Taleh İsgəndər oğlu Məmmədov 29 oktyabr 1992-ci ildə Ağdamın Şelli kəndində yaralıları döyüş bölgəsindən çıxararkən şəhidlik zirvəsinə ucalıb.
Şəhidimiz Gəncə Şəhidlər xiyabanında dəfn edilib.
