Gəncədə bir qrup uşağa ödənişsiz psixoloji dəstək göstəriləcək. Bu haqda 8 sentyabr tarixində YAP Gəncə şəhər təşkilatına istinadən məlumat veririk.
YAP Gəncə şəhər təşkilatı və “Loqos” Psixoloji və Nitq İnkişaf Mərkəzinin Gəncə Regional filialının birgə təşkilatçılığı ilə şəhidlərimizin övladlarına psixoloji dəstək məqsədilə yeni sosial təşəbbüsə start verilib. Tədbirdə Vətən uğrunda canlarından keçən həmvətənlərimizin övladlarına və Gəncəyə raket hücumu nəticəsində hər iki valideynini itirmiş balacalara psixoloji dəstək göstərilib.
“Loqos” Psixoloji və Nitq İnkişaf Mərkəzinin Regional direktoru Günay Hüseynova tərəfindən uşaqlarla ayrı-ayrılıqda söhbətlər aparılıb, onları narahat edən məqamlara diqqət yetirilib. Uşaqların kommunikasiya bacarıqlarının, emosiyalarını idarə etmək kimi vərdişlərinin inkişafı istiqamətində məsləhətlər verilib.
Sonda mərkəzin balacalara müxtəlif dərs ləvazimatlarından ibarət hədiyyələri təqdim edilib.
