Bu gün şəhid Qeorqiy Lazarev və Səfaləddin Əsgərovun doğum günüdür.
Qeorqiy Nikolayeviç Lazarev 9 iyun 1960-cı ildə Şəmkir rayonunun Leninkənd kəndində anadan olub. Uşaq yaşlarında ikən ailəsi ilə birlikdə Gəncə şəhərinə köçüblər. O, Gəncə şəhər 39 saylı orta məktəbi bitirib. Qeorqiy sovet ordusu sıralarında xidmət edib. Əsgərlikdən qayıtdıqdan sonra Alüminium zavodunda işləyib.
O, 1 noyabr 1993-cü ildə cəbhəyə yollanıb və burada bir neçə döyüş tapşırıqlarında iştirak edib. Qeorqiy Nikolayeviç Lazarev 27 dekabr 1993-cü ildə Ağdərə rayonu uğrunda gedən döyüşdə şəhidlik zirvəsinə ucalıb.
Səfaləddin Sadəddin oğlu Əsgərov 9 iyun 1968-ci ildə Gəncədə anadan olub. 43 saylı orta məktəbi bitirdikdən sonra 1983-1988-ci illərdə 9 saylı peşə-məktəbində oxuyub və suvaqçı-rəngsaz peşəsinə yiyələnib. 1986-cı ildə həqiqi hərbi xidmətə çağırılıb, 1988-ci ildə isə Kalininqrad şəhərində hərbi xidmətini başa vurub, Vətənə qayıdıb. Bundan sonra fərdi əməklə məşğul olub.
O, 1992-ci ilin fevralında könüllü olaraq cəbhəyə yollanıb, 826 saylı hərbi hissənin tərkibində ermənilərə qarşı vuruşub. Səfaləddin Sadəddin oğlu Əsgərov 26 iyul 1993-cü ildə Ağdam rayonunun Buəhmədli kəndində döyüş tapşırığını yerinə yetirərkən düşmən gülləsinə tuş gəlib və şəhidlik zirvəsinə ucalıb.
