Gəncədə 31 Mart - Soyqırımı Günü qeyd olunub. Bu haqda 29 mart tarixində Heydər Əliyev Mərkəzinə istinadən xəbər veririk.
“31 Mart Soyqırımı – tarixin qanla yazılmış yaddaşı” mövzusunda anım günü keçirilib. Tədbir Regional Mədəniyyət İdarəsi, Heydər Əliyev Mərkəzi və 16 nömrəli Kitabxana filialı tərəfindən təşkil olunub. Burada Ombudsmanın Qərb Regional Mərkəzinin sədri, Sənaye və Texnologiyalar üzrə Gəncə Dövlət Peşə Təhsil Mərkəzinin müəllim və tələbələri, 13 nömrəli məktəbin müəllim və şagirdləri iştirak ediblər.
Anım günündə qeyd edilib ki, 1918-ci ilin mart soyqırımları öz amansızlığına və miqyasına görə təkcə Azərbaycan tarixində deyil, bəşər tarixində ən qanlı hadisələrdən biridir. Daha sonra məktəblilər şəhidlərə və soyqırıma həsr olunmuş şeir kompozisiyası ilə çıxış ediblər.
