Gəncədə tarixi tikili baxımsız haldadır. Bu haqda 3 oktyabr tarixində Baku TV-yə istinadən məlumat veririk.
Söhbət 200 ilə yaxın yaşı olan Hüseyniyyə məscidindən gedir. Tikili müxtəlif dövlərdə məscid, mədrəsə, hətta mehmanxana kimi fəaliyyət göstərib. Sovet dövründə və ondan sonrakı illərdə isə kitabxana kimi istifadə olunub.
Hazırda tarixi abidə bir neçə ildir ki, tərk edilib. Tədqiqatçı Elçin Ələsgərov bildirir ki, tikili 1825-ci ildə inşa olunub, lakin bəzi mənbələrdə 1886-cı il qeyd olunub.
“Tarixi baxımdan çox zəngin bir məkandır. Əlbəttə ki, bura diqqət artmalıdır, restavrasiya olunmalıdır. İlk dəfə tikiləndə müqəddəs şəxslərin mövlud günlərin keçirilməsi üçün, onların şəhadət günlərinin keçirilməsi üçün bir növ qəriblər evi kimi fəaliyyət göstərirdi. Artıq zaman ötdükcə ərazisi yekə olduğu üçün burda minbər tikilib və get-gedə məscidə çevrilmişdir. Bura tatlar məscidi də deyirlər, amma əsl adı Hüseyniyyə məscididir”, - deyə Ələsgərov qeyd edib.
Məsələ ilə bağlı Mədəni İrsin Qorunması, İnkişafı və Bərpası üzrə Dövlət Xidmətinin Gəncə Regional İdarəsindən bildirilib ki, tikili aşınmaya məruz qaldığı üçün qəzalı vəziyyətə düşüb.
“Tarix memarlıq abidəsi olan tatlar Hüseyniyyə məscidi XIX əsrin abidəsidir və o, aşınmaya məruz qalmışdır. Nəticədə qəzalı vəziyyətə düşüb. Yaxın aylarda, ya gələn il orada təmir-bərpa işləri həyata keçiriləcək. O lövhə də dəyişilməlidir”, - deyə baş mütəxəssis Abbas Məmmədov qeyd edib.
