Gəncədə təmir işləri aparılır. Bu haqda 25 noyabr tarixində Kəpəz televiziyasına istinadən məlumat veririk.
Şəhərin Cavadxan küçəsində iki, Xan bağında digər iki fəvvarə yenilənib. Onların sulama, işıqlandırma və motor sistemləri dəyişdirilib, həmçinin görünüşləri fərqli dizayna salınıb.
Bundan başqa, şəhərin baş meydanında da iki fəvvarə yenidən qurulur. Qurğuların işıqlandırılması yenilənir. Fəvvarədə su musiqinin ritminə uyğun olaraq hərəkət edəcək. Həmçinin onlar üçün ayrıca nasosxanalar yaradılır və idarəetmə proqramı hazırlanır.
Layihəyə əsasən, bu fontanların içərisində milli gerbimizin görüntüsü əks olunacaq. Bu yolla hərəkət edən vətəndaşlar fontandan axan suların altından keçəcəklər. Heydər Əliyev meydanındakı monitorun qarşısındakı fontan isə işə salınarkən su ay-ulduz effekti yaradacaq.
Bildirilir ki, materiallar Çindən və Macarıstandan gətirilir. İşlərin gələn ilin ortalarınadək tamamlanması planlaşdırılır.
