Gəncədə hərbi şəhərciyin sakinləri nəqliyyatla bağlı çətinlik yaşayırlar. Bu haqda Gencexeber.az-a 13 mart tarixində məlumat daxil olub.
Söhbət 38 saylı hərbi şəhərcikdən gedir. Sakinlər bildirirlər ki, yaşayış massivinin daxilinə heç bir marşrut xəttinin avtobusları işləmir. Burada yaşayan əhali ictimai nəqliyyata minmək üçün 500 metr məsafə qət etməli olur. Sözügedən hal sakinlərin narahatlığına səbəb olur.
“Yayın istisində, digər fəsillərin yağışında, qarında avtobusa minmək üçün hər gün xeyli yol getməli oluruq. Təxminən 4 il öncə şəhəriciyin daxili küçələri ilə 8 nömrəli marşrut xəttinin mikroavtobusları hərəkət edirdi. Daha sonra onu ləğv etdilər. Aidiyyəti qurumlardan bu çətinliyimizin aradan qaldırılması üçün tədbirlər görməsini xahiş edirik”, - deyə vətəndaşlar qeyd ediblər.
