Gəncədə sahibkarlardan biri mağazasından istifadə edə bilmir. Bu haqda 22 avqust tarixində Xəzər Xəbər-ə istinadən məlumat veririk.
Söhbət sahibkar Elvin Abdiyevdən gedir. Vətəndaş bildirir ki, mebel mağazasından uzun müddətdir ki, istifadə etməkdə çətinlik çəkir. Səbəb obyektin ətrafındakı ərazinin digər sahibkara icarəyə verilməsi və ehtiyat qəza çıxışının onlar tərəfindən bağlanmasıdır. Onun sözlərinə görə, qapı həmkarı tərəfindən kərpiclə hörülüb.
Abdiyevin vəkili deyir ki, ehtiyat qapının qanunsuz olaraq bağlanmasının təhlükəsizlik tələblərini pozması FHN-in müvafiq qurumlarının aktları ilə də təsbit olunub və açılmasına dair qərar verilib. Həmin qərar rəsmi olaraq aidiyyəti üzrə göndərilsə də, icrası həyata keçirilməyib.
Vəkillər kollegiyasının üzvü Elnur Əliyev mövzunu şərh edərək bildirib ki, FHN-in ehtiyat qapının açılması ilə bağlı müvafiq məktublarına əsasən, qapının açılması İcra Hakimiyyəti və polisin iştirakı ilə məcburi qaydada təmin edilməlidir.
