Gəncədə tələbələrlə görüş təşkil olunub. Bu haqda 6 dekabr tarixində ADAU-ya istinadən xəbər veririk.
Grand Agro MMC-nin əməkdaşları “Agro Food İnvestments” qrupa daxil olan Azərbaycan Dövlət Aqrar Universitetinin tələbələri ilə görüşüblər. Tədbirin məqsədi tələbələri AFİ Karyera Mərkəzinin fəaliyyəti haqqında məlumatlandırmaq olub. “Aqronomluq”, “Bağçılıq”, “Torpaqşünaslıq və Aqrokimya”, “Meliorasiya mühəndisliyi”, “Aqromühəndislik” və “Bitki mühafizəsi” ixtisasları üzrə tələbələrə ödənişli təcrübə proqramı barədə xəbər verilib.
Qeydiyyatdan keçən gənclər test imtahanından keçdikdən sonra müsahibə mərhələsinə şans qazanacaqlar. Burada tələblərə cavab verən 15-20 nəfər namizəd təcrübə proqramında iştirak edə biləcək. Bu tələbələr mütəmadi olaraq, yerli və xarici mütəxəssislərdən nəzəri və praktik biliklər alacaq, həmçinin onların praktik biliklərini gücləndirmək üçün xarici ölkələrə səfərləri də şirkət tərəfindən təmin olunacaq. Sonda uğurlu olan namizədlər sertifikat əldə edərək, şirkətlər qrupunda işlə təmin olmaq imkanı qazanacaqlar.
Təcrübə proqramında tələbəyə 600-800 manat arası təqaüd şirkət tərəfindən ödəniləcək.
Qeyd edək ki, görüşdə, həmçinin AFİ Qrupun İnsan resursları departamentinin müdiri Fərid Nəcəfov, Grand Agro MMC-nin İnsan resursları şöbəsinin müdiri Emil İbişov və baş mütəxəssis Leyla Ələkbərova iştirak ediblər.
