TƏBİB-nin və Gəncə Birləşmiş Xəstəxanasının təşkilatçılığı ilə konfrans baş tutub. Bu haqda 4 mart tarixində Mərkəzi Gömrük Hospitalına istinadən xəbər veririk.
“Uşaqlıq miomalarının müalicəsinə müasir yanaşma” mövzusunda “Ginekologiyanın aktual problemləri” adlı konfrans keçirilib. Burada Mərkəzi Gömrük Hospitalının Mama-ginekologiya şöbəsinin mama-ginekoloqu, tibb üzrə fəlsəfə doktoru Sədi Allahverdiyev çıxış edib.
Gəncə Dövlət Filarmoniyasında keçirilən tədbirdə doktor Sədi Allahverdiyev uşaqlıq miomasının aktuallığı, yaratdığı kliniki simptomlar barədə məlumat verib. Eyni zamanda hospitalda icra olunan müxtəlif lokalizasiyalı uşaqlıq milmalarının videoprezentasiyalarını təqdim edib.
4 paneldən ibarət bu konfransda sonsuzluq, təbii doğuş, qeysəriyyə kəsiyi əməliyyatı, uşaqlıq cismi xərçəngində müasir yanaşma, qadın xəstəliklərinin müayinə və müalicəsində tətbiq olunan yeniliklər və son tədqiqatlar barədə təqdimatlarla çıxış edilib.
