Daha bir xarici universitet əməkdaşları Gəncəyə səfər ediblər. Bu haqda 24 iyun tarixində ATU-ya istinadən məlumat veririk.
Rumıniyanın "Gheorghe Asachi" İasi Texniki Universitetinin Mühəndislik və Tekstil məhsullarının Dizaynı kafedrasının 3 nəfərlik professor-müəllim heyəti Erasmus+ proqramı çərçivəsində Azərbaycan Texnologiya Universitetində olublar. Proqramın ilk günləri Qabaqcıl Materiallar, Məhsullar və Proseslər üzrə Araşdırma Mərkəzinin direktoru, Beynəlxalq Toxuculuq Texnoloqları Federasiyasının (IFKT) Rumıniya bölməsinin prezidenti professor Mirela Blaqa, Alina İovan-Draqomir və Mariana İçimin universitetin Tədris və Beynəlxalq əməkdaşlıq şöbələrinin əməkdaşları ilə görüşü keçirilib.
Tədbirdə mövcud əməkdaşlığın genişləndirilməsi, ikili diplom proqramlarının tətbiqi, mübadilə sayının artırılması, hər iki ölkənin təhsil sistemi və mədəniyyəti ilə bağlı geniş müzakirələr aparılıb, təklif və tövsiyələr dinlənilib.
Daha sonra nümayəndə heyəti universitetin Yüngül sənaye mühəndisliyi və logistika fakültəsinin professor-müəllim heyəti ilə görüşüb, öz ölkə və universitetlərinə aid maraqlı məruzələrlə çıxış ediblər. Dizayn və tekstil sahəsinə dair fikir mübadiləsi aparılıb. Daha sonra qonaqlar digər fakültə dekanları və professor müəllim heyəti ilə görüşüblər, sıx əməkdaşlıq imkanları müzakirə edilib.
