Gəncədə tibbi aksiya baş tutub. Bu haqda 2 may tarixində Birləşmiş Xəstəxanaya istinadən məlumat veririk.
Sosial təşəbbüs Gəncə Şəhər Birləşmiş Xəstəxanası tərəfindən həyata keçirilib. Aksiya “Təmas” Regional İnkişaf İctimai Birliyinin nəzdində fəaliyyət göstərən İnsan alveri və insan alverinin potensial qurbanlarına xidmət edən regional reabilitasiya-reinteqrasiya mərkəzində (sığınacaq) təşkil olunub.
Burada gender əsaslı zorakılıq qurbanlarına dəstək göstərən təşkilatın qeydiyyatında olan 14 qadın və 14 uşaq tibbi müayinədən keçib. Müayinəyə kardioloq, ginekoloq, terapevt, oftalmoloq, pediatr və radioloqlar cəlb ediliblər.
Qeyd edək ki, növbəti günlərdə sığınacaqda psixoloq və nevroloq qəbullarının da təşkil olunması nəzərdə tutulub.
