Gəncədə universitet əməkdaşları Tacikistana səfər ediblər. Bu haqda 3 iyul tarixində GDU-ya istinadən məlumat veririk.
Tacikistan Respublikasının Düşənbə şəhərində “Biomüxtəlifliyin öyrənilməsi” adlı beynəlxalq elmi seminar keçirilib. Burada müxtəlif ölkələrdən 40-a yaxın alimin arasında GDU-nun əməkdaşları da olub. Məqsəd bioloji müxtəlifliyə dair müasir tədqiqatları bölüşmək və bu istiqamətdə problemləri müzakirə etmək idi.
Tacikistan Elmlər Akademiyasının prezidenti, akademik Farhod Rahimi çıxışında qarşılıqlı elmi mübadilələrə hər zaman hazır olduqlarını vurğulayıb. Seminarda GDU-nun Ekologiya və təbiəti mühafizə kafedrasının müdiri Sevda Əhmədova “İşğaldan azad olunmuş Qarabağın ekoloji durumu”, Anatomiya, Fiziologiya və Zoologiya kafedrasının əməkdaşları Güləbatın Hümbətova “Gəncə-Qazax zonasında ekoloji mühitin gilas sortlarının inkişafına təsiri” və Lalə Abdullayeva “Azərbaycanın ekoloji şəraitində tut yarpağının yetişməsinin tut ipəkqurdunun bəslənməsinə təsiri” mövzusunda məruzələrlə çıxış ediblər.
Bundan başqa, Sevda Əhmədova tərəfindən ermənilər tərəfindən Qarabağ bölgəsində meşə sahələrinin, flora və faunanın məhv edilməsi, su resurslarının çirkləndirilməsi, təbii sərvətlərin qeyri-qanuni istismar olunmasından ətraflı bəhs edilib və mövzuya uyğun videoslaydlar nümayiş olunub.
Beynəlxalq seminar çərçivəsində GDU-nun nümayəndə heyəti Düşənbə şəhərinin kitabxanasında olub, həmçinin Botanika bağına, “Kondara” Varzob dağlıq-botaniki stansiyasına, “Siyekux” yüksək dağlıq bioloji stansiyasına ekspedisiyaya gedib.
Seminarın yekununda Tacikistan Elmlər Akademiyasının prezidenti Farhod Rahimi tərəfindən tədbir iştirakçılarına sertifikatlar təqdim edilib.
