Gəncə Dövlət Universitetində (GDU) “Code For Future” layihəsi çərçivəsində icra olunan “Code Academy”nin “Məzun günü” keçirilib. Bu barədə 3 iyul tarixində GDU-ya istinadən məlumat veririk.
“Code Academy” tədris müəssisəsinin təsisçisi və direktoru Ülvi Aslanov çıxış edərək məzunları təbrik edib. O, öz çıxışında 2022-2023-cü tədris ilinin yaz semestrində 66 tələbənin layihə üzrə məzun olduğunu qeyd edib.
İnnovasiya və Rəqəmsal İnkişaf Agentliyinin rəqəmsal təhsil layihələri üzrə keyfiyyətə nəzarət, monitorinq və qiymətləndirmə üzrə məsul şəxsi İbrahim Qədirov layihənin üstünlüklərindən danışaraq informasiya texnologiyaları sahəsində bilik və bacarıqların artırılmasının əmək bazarının tələbi olduğunu vurğulayıb.
Daha sonra tədrisi başa vuran GDU tələbələrinin hazırladıqları layihələrin təqdimatı keçirilib.
