Gəncədə yanacaqla bağlı çətinlik yaşanır.
Qafqazinfo-nun verdiyi məlumata əsasən, özəl yanacaqdoldurma məntəqələrində çalışan bir neçə əməkdaş yanacaq qıtlığından danışıb. Onların sözlərinə görə, hazırda Gəncə və ətraf bölgələrdə benzin və solyarka çatışmazlığı mövcuddur:
“Benzin tapmaq olmur. Artıq bəzi yanacaqdoldurma məntəqələri benzin satışını dayandırıb”.
6-saylı Gəncə Neft Baza Sahəsinin əməkdaşları da eyni şikayətlə müraciət ediblər:
“Təxminən 1 aya yaxındır, yanacaq yoxdur. Bununla bağlı dəqiq məlumat bildirilmir. Baza hazır vəziyyətdədir və yanacağın qəbulunda heç bir problem yaşanmır. Əslində benzin qıtlığının səbəbi onun daşınmasındadır. Və bunu “Azərbaycan Dəmir Yolları” (ADY) QSC aradan qaldırmalıdır”.
Sözügedən məsələ ilə əlaqədar “SOCAR Petroleum”dan bildirilib ki, yanacaqla bağlı şirkət tərəfindən hər hansı çatışmazlıq yoxdur. Bütün neft bazası sahələrini və yanacaqdoldurma stansiyalarını tam təmin edəcək miqdarda yanacaq ehtiyatı var.
Hazırda daşınma ilə bağlı müəyyən problem yarandığından bölgələrə yanacaq təchizatında müvəqqəti fasilə yaranıb. Problem aradan qalxdıqda bütün bölgələrimizdə fəaliyyət göstərən NBS-lər yanacaqla təmin ediləcək.
Yanacaqdoldurma məntəqələrindəki əməkdaşların iddiaları ilə bağlı “Azərbaycan Dəmir Yolları” QSC-dən verilən cavab isə belə olub:
“ADY daşımaların vaxtında və təhlükəsiz həyata keçirilməsi üçün bütün resurslara malikdir. Sifariş olduğu təqdirdə müvafiq qaydada icra olunacaq”.
