Gəncədə məşğulluqla bağlı tədbir keçirilib. Bu haqda 8 sentyabr tarixində İcra Hakimiyyətinə istinadən məlumat veririk.
Məşğulluğa kömək göstərən əlaqələndirmə komitəsinin növbəti iclası “Gəncə Tekstil” ASC-də baş tutub. Burada icra başçısının müavini Adil Tağıyev, Dövlət Məşğulluq Agentliyinin Gəncə-Daşkəsən Məşğulluq filialının, Dövlət Sosial Müdafiə Fondunun Gəncə-Daşkəsən Regional filialının, Dövlət Əmək Müfəttişliyi Xidmətinin Gəncə-Daşkəsən Regional şöbəsinin, şəhər ərazisində yerləşən bələdiyyələrin və “Gəncə Tekstil” ASC-nin əməkdaşları iştirak ediblər.
Görüşdə qeyri-formal məşğulluğun qarşısının alınması istiqamətində qanunvericilikdə nəzərdə tutulan imkanlar və sanksiyalar müzakirə olunub. Həmçinin işsizliyin azaldılması məqsədilə işaxtaran və ya işsiz şəxslərə müvafiq bilik və bacarıq verməklə qısa müddətdə əmək bazarının tələblərinə cavab verən ixtisaslı kadrların hazırlanmasında peşə hazırlığının əhəmiyyətindən danışılıb.
Bildirilib ki, bu istiqamətdə həyata keçirilən maarifləndirmə tədbirləri mütəmadi olaraq davam etdiriləcək.
