Gəncədə təmir işlərindən sonra qazılmış vəziyyətdə qalan ərazi sakinlərə təhlükə yaradır. Bu haqda Gencexeber.az-a 24 iyul tarixində məlumat daxil olub.
Bu hal şəhərin Heydər Əliyev prospekti, 54a-54b küçələrində yerləşən binaların qarşısında qeydə alınıb.
Bir neçə gün öncə “Azərsu” ASC əməkdaşları nasaz vəziyyətdə olan su xəttini təmir ediblər. Kommunal qəza aradan qaldırıldıqdan sonra isə ərazi qazılmış vəziyyətdə qalıb.
“Dəfələrlə şikayət olunandan sonra su borusunu qazıb düzəldiblər, amma üstünü örtməyib çıxıb gediblər. Artıq burada 2-si uşaq (azyaşlı) olmaqla 3 nəfər yıxılaraq xəsarət alıb. Müraciət etmişik, lakin hələ bir nəticə yoxdur”, - deyə sakin bildirib.
