Gəncə sakinləri illərdir Aşıq Ələsgər küçəsində yaşanan bir sıra problemlərdən şikayət ediblər.
Gencexeber.az məlumat verir ki, sözügedən ərazidə işıq təchizatı və yolun asfalt örtüyü ilə bağlı ciddi problem müşahidə edilir. Sakinlərin sözlərinə görə, şəhərdə qeyri-sabit hava şəraiti hökm sürdükdə elektrik enerjisinin təminatında kəsintilər baş verir. Bu hal saatlarla davam edir. Bir çox vaxtlarda isə elektrik gərginliyində xeyli zəifləmə, dərhal sonra isə kəskin sıçrayışlar baş verir. Bu səbəbdən vətəndaşların evlərində istifadə olunan müxtəlif növ məişət və elektron texnikaları zərər görür, bəzən isə sıradan çıxır.
“Artıq neçə gündür hava dəyişəndən “sovet” dövründəki kimi gün ərzində saatlarla işıqlarımız yoxdur. Evdə xəstəmiz, körpə uşağımız var. Əziyyət çəkirik”, - sakin bildirib.
Ərazidə yaşayanlar uzun müddət “Azərişıq” ASC-nin yerli bölməsinə və “199” Çağrı Mərkəzinə şikayətlərini bildirsələr də çatışmazlıqlar hələ də aradan qaldırılmayıb.
Eləcə də, Aşıq Ələsgər küçəsinin yolu yağış yağanda yararsız hala düşür. Asfalt örtüyünün olmaması piyadaların hərəkətini məhdudlaşdırır: orada qatı palçıq və iri gölməçələr əmələ gəlir. Həmin yerdə yaşayanlar bildirirlər ki, təxminən iki kilometr uzunluğu olan küçədə avtobus marşrutları fəaliyyət göstərmir. Bu səbəbdən sakinlər ictimai nəqliyyatdan istifadə etmək üçün uzun məsafəni piyada qət etməyə məcbur olurlar.
