Gəncədə gənclər üçün növbəti proqram həyata keçiriləcək. Bu haqda Gencexeber.az-a 13 iyun tarixində məlumat daxil olub.
Avrasiya Əməkdaşlıq Fondu (AƏF) Avropa İttifaqı tərəfindən maliyyələşdirilən gənclər üçün “Gəncə Münaqişə Məktəbi 2023” layihəsinə qeydiyyat başlayıb. Burada Gəncə və ətraf rayonlardan olan 18-28 yaş arası münaqişə transformasiyası ilə maraqlanan gənclər qatıla bilərlər.
Layihənin məqsədi Azərbaycan gənclərinin münaqişə və sülh sahəsində bilik və bacarıqlarını artırmaq və beləliklə, müxtəlif beynəlxalq platformalarda Azərbaycan və Ermənistan arasındakı münaqişə ilə bağlı aparılan müzakirələrdə uğurla iştirak edə biləcək yeni nəslin formalaşmasına töhfə verməkdir. Proqram Azərbaycan dilində keçirilir. Layihə müxtəlif mövzularda akademik və praktik sessiyalardan ibarətdir, formal və qeyri-formal təhsil metodlarını əhatə edir.
Qatılmaq üçün qeydiyyatdan keçmək mütləqdir. Son müraciət tarixi 12 iyuldur. Layihə 9-14 avqust tarixlərində keçiriləcək.
Qeyd edək ki, Gəncədən kənarda yaşayan iştirakçıların yol, yaşayış və yaşayışla bağlı digər xərcləri qarşılanmayacaq. Namizədlərin müsahibəyə dəvət edilməsi və seçilməsi müraciət etmə tarixinə əsasən aparılacaq.
