4 gün əvvəl kanalın daşması səbəbindən yaranan sel hələ də evlərə zərər vurmaqda davam edir. Bu haqda ARB-yə istinadən 22 iyun tarixində məlumat veririk.
Xan arxı ətrafında yaşayan sakinlər yağıntılı havalar davam etdiyi müddətdə eyni aqibətlə təkrar üzləşəcəklərindən narahatdırlar. Onlar bildirirlər ki, buna səbəb arxın vaxtlı-vaxtında təmizlənməməsidir.
Havanın 38-40 dərəcə isti olmasına baxmayaraq, binalarda nəmlik müşahidə olunur. Bəzi ev sahibləri nəmliyi aradan qaldırmaq məqsədilə qapıları açıq qoyurlar.
Plastik və şüşə butulkalar, dərman qabı, başmaq tayı, geyim, yəni istənilən növ məişət tullantısını kanalın içərisində görmək olar.
Bu, ondan xəbər verir ki, dolayısı ilə kanalın ara-sıra daşmasında əhali faktoru da rol oynayır.
Göygöl suvarma sistemi idarəsinin nümayəndəsi bildirib ki, kanalın ətrafı - yaxın məsafələr qoruq zolağı kimi zəbt olunub, bu yer ən azı 10-15 gündən bir təmizlənir.
O, əlavə edib ki, bir neçə rayonda daşqınlar səbəbindən bəzi bəndlər dağılıb. Biz vətəndaşları, eyni zamanda suvarma suyu ilə də təmin etməliyik.
İdarə rəsmisi onu da qeyd edib ki, bəzi vətəndaşlar haqlı olaraq, yaxınlıqlarında zibil qablarının qoyulmamasından şikayətçidirlər.
Zibil qutuları ilə bağlı problem kanalboyu yerləşən Bayan küçəsində də müşahidə olunur.
Kifayət qədər uzunluğu olan küçədə bir dənə də olsun, zibil qutusuna rast gəlinmir. Bu küçənin sakinləri tullantıları həftədə cəmi 1 dəfə gələn Gəncə şəhər MKTİB-nin zibilyığan maşınlarına tökürlər.
Gəncə şəhər MKTİB isə sakinləri zibil pulu ödənişindən yayınmaqda, bundan başqa, qutuların həyətin qarşısına qoyulmasına icazə verməməkdə günahlandırır. Qurumdan şifahi olaraq o da deyildi ki, məsələyə yalnız sakinlərin öhdəlik götürəcəkləri təqdirdə əncam çəkiləcək.
