Şəmkirin Çaparlı kəndindən Gəncəyə getmək üçün heç bir avtobus fəaliyyət göstərmir.
Gencexeber.az məlumat verir ki, iki il əvvələ kimi yerli sakinlər hər gün mütəzəm olaraq 21 nəfər tutumu olan avtobusdan istifadə etsələr də hazırda bu istiqamət üzrə heç bir sərnişindaşıma həyata keçirilmir.
Şikayətçi Fuad Məmmədov bildirib ki, qeyd olunan istiqamət üzrə şəxsi avtobusu ilə çalışan sürücünün səhhətində yaranan problemlərdən sonra o, işini tərk edib. Onu əvəzləyən digər sürücü isə sərnişinlərə qrafikinin uyğun gəlmədiyini bildirərək, davam etməyib.
Sakinlər bu müddət ərzində əziyyət çəkdiklərini bildiriblər:
“Bizim kənd ərazi olaraq Gəncəyə daha yaxındır. Ancaq biz mənzil başına çatmaq üçün əvvəlcə kənddən 8 kilometr aralıda olan Şəmkirə yollanmalıyıq. Belə vəziyyətdə vətəndaşlar iki fərqli avtobus dəyişməli olurlar. Bu da səfəri əlverişsiz, bahalı və vaxt aparan edir. İndiyə kimi nəqliyyat ehtiyacımıza məhəl qoyulmayıb”.
Yerli sakinlər gediş-gəlişi, eləcə də gündəlik həyatlarını asanlaşdırmaq üçün müntəzəm avtobus xidmətlərinin bərpasını tələb edirlər.
