Gəncə Dövlət Milli Dram Teatrı yeni mövsümə hazırlaşır.
Mədəniyyət Nazirliyinin məlumatına görə, teatr Əziz Nesinin sosial komediyasını təqdim edəcək. Yeni mövsümdə mədəniyyət ocağı sentyabrın 19-dan fəaliyyət göstərəcək.
Hazırda teatrda Rey Kuninin “Nömrə 13” komediyasının qurma məşqləri gedir. Tamaşanın quruluşçu rejissoru Əməkdar artist Nicat Kazımov, quruluşçu rəssamı Mustafa Mustafayevdir. Rolları Xalq artisti Pərvanə Qurbanova, Əməkdar artistlər Elxan Abbasov, Kəmalə Məmmədova, Ramiz Vəliyev, Aslan Şirin (Akademik Milli Dram Teatrından dəvətli) və dram artistləri Ruslan Hüseynov, Murad Meyfaliyev, Şəlalə Rüstəmova, Samir Abbasov, Zeynəb Hüseynova və Elmir Məmmədov ifa edirlər.
Bundan başqa, türk dramaturqu Birgül Gülər Yaşıloğlunun “Qadınlar danışarsa” pyesi əsasında eyniadlı tamaşasının da məşqləri gedir. Səhnə işinin quruluşçu rejissoru teatrın baş rejissoru, Prezident mükafatçısı Elşad Əhmədov, quruluşçu rəssamı Mehdi Hüseynovdur. Musiqili tamaşada rolları Xalq artisti Pərvanə Qurbanova, Əməkdar artistlər Kəmalə Məmmədova, Rahilə Məmmədova və aktrisa Sevinc Hüseynova oynayacaqlar.
Həmçinin cari ilin sonuna qədər Nəcəf bəy Vəzirovun “Yağışdan çıxdıq, yağmura düşdük” komediyasının (rejissor Əməkdar incəsənət xadimi Mirbala Səlimli) və Toyqun Orbayın “İnsan oğlunun şərəfinə” (rejissor Elşad Əhmədov) dramatik tamaşalarının da təqdimatı nəzərdə tutulub.
