Mahrasa bağı yaşayış massivi ərazisində 50-dən çox yaşayış evi susuz qalıb.
Gencexeber.az məlumat verir ki, Vatutin və Mikayıl Müşfiq küçələrində su təchizatında vəziyyət getdikcə kritikləşir. Sakinlərin sözlərinə görə, onlar 2023-cü ilin fevral ayına qədər M.Füzuli adına 22 nömrəli tam orta məktəbin yaxınlığında yerləşən artezian quyusundan su ilə təmin olunublar. Lakin qonşu küçəyə yeni ağ (içməli) su xəttinin çəkilməsi ilə əlaqədar artezianın fəaliyyəti dayandırılıb. Sakinlər isə etibarlı su mənbəyindən məhrum qalıblar.
Vatutin və Mikayıl Müşfiq küçələrinin boruları müvəqqəti olaraq qonşu küçədəki yeni çəkilən su xəttinə birləşdirilib. Nəticədə 50-dən çox yaşayış evinə lazımi həcmdə, bir çox hallarda isə ümumiyyətlə su gəlmir. “Ötən ilin qış aylarından etibarən su demək olar ki, gəlmir. Son bir ay ərzində isə ümumiyyətlə verilməyib. Bu səbəbdən mən hətta başqa evə köçmək məcburiyyətində qalmışam”, - sakinlərdən biri deyib.
Əlavə edilib ki, cəmi 10 metr aralıda yerləşən bina evlərinə su problemsiz verilir, hətta ehtiyat çənlər dolub-daşanda su küçəyə tökülür. Qeyd etmək lazımdır ki, çoxmənzilli tikililər susuz qalan həyət evləri kimi son bir il yarımadək qapadılan artezian quyusundan su ilə təmin edilib.
Sakinlər tərəfindən “Azərsu” ASC-yə dəfələrlə müraciət olunsa da, sözügedən məsələnin həlli istiqamətində real addımlar atılmayıb.
