Gəncə Şəhər İcra Hakimiyyəti Mənzil Kommunal Təsərrüfatı İstehsalat Birliyi vətəndaşların növbəti qəbulunu keçirib. Bu haqda 1 mart tarixində Gəncə MKTİB-yə istinadən xəbər veririk.
Qəbulda iştirak edən sakinlərin kommunal sahə ilə bağlı şikayət və təklifləri dinlənilib. Səslənən müraciətlər arasında, əsasən, işlə təminat, ödənişlərlə bağlı problem, dam örtüyünün yenilənməsi, küçə işıqlandırılması, məişət tullantıları üçün nəzərdə tutulan konteynerlərin yerləşdirilməsi kimi məsələlər üstünlük təşkil edib. Vətəndaşları dinləyən Mənzil Kommunal Təsərrüfatı İstehsalat Birliyinin rəis müavinləri səsləndirilən şikayət və təkliflərin qanunvericiliyə uyğun həll olunması istiqamətində qurumun müvafiq şöbələrinə tapşırıqlar veriblər.
Gəncə Şəhər İcra Hakimiyyəti Mənzil Kommunal Təsərrüfatı İstehsalat Birliyinin fəaliyyət dairəsinə daxil olmayan məsələlərlə bağlı vətəndaş müraciətləri qeydiyyata alınaraq müvafiq qurumlara göndərilməsi üçün nəzarətə götürülüb.
