Gəncədən yaradıcı heyət Bakıya yollanıb. Bu haqda 2 may tarixində Apa-ya istinadən məlumat veririk.
Konsert Fikrət Əmirov adına Gəncə Dövlət Filarmoniyasının "Gəncədən Bakıya" layihəsi çərçivəsində baş tutub. Tədbir Azərbaycan Musiqi Mədəniyyəti Dövlət Muzeyində keçirilib.
Muzeyin direktoru Alla Bayramova bildirib ki, Gəncə Dövlət Filarmoniyasının solistləri muzeydə ilk dəfə qonaq olurlar. Daha sonra konsert proqramı baş tutub.
Burada Xalq artisti Sevinc İbrahimova, Əməkdar artist Kəmalə Tağızadə, solistlər Vasif Bayramov, Rüstəm Cəfərov, Tural Abdullayev, gənc vokalçılar Fidan Məmmədzadə, Qaya Nəsibzadənin ifasında Asəf Zeynallının “Ölkəm” romansı, Üzeyir Hacıbəylinin “Arşın mal alan” operettasından Gülçöhrənin, “Koroğlu” operasından Həsən xanın, Müslüm Maqomayevin “Nərgiz” operasından Nərgizin, “Şah İsmayıl” operasından Aslan şahın, Fikrət Əmirovun “Sevil” operasından Balaşın mahnısı, “Ulduz” romansı, Niyazinin “Arzu” romansı, Kristof Qlük “Aria”, Ernesto de Kurtis “Sorentoya qayıt”, Cakomo Puççini “La Bohema” operasından Müzettanın valsı, Ernesto de Kurtisin “Məni unutma” əsərləri səsləndirilib.
Qeyd edək ki, proqram iki gün davam edib.
