Gəncədə küçələrin birində kanalizasiya xətti mövcud deyil.
Gencexeber.az-a sakinlərdən daxil olan məlumata görə, söhbət Natəvan qəsəbəsi, Ənvər Arazov küçəsindən gedir.
Şikayətçinin sözünə görə, illərdir kanalizasiya xəttinin olmamasından əziyyət çəkirlər:
“Burada 18-ə yaxın ev var, məcbur olub hamı məhəlləsində quyu qazdırıb. Mütəmadi olaraq onların təmizlənməsi isə baha başa gəlir. İllərdir bu cür davam edir. Bizim küçə Milli Qəhrəmanın adını daşıyır”.
Həmçinin əlavə edilib ki, vəziyyətlə bağlı aidiyyəti qurumlara məlumat verilsə də, nəticəsi olmayıb.
Məsələ ilə bağlı İcra Hakimiyyətinə yönləndirdiyimiz sorğuya cavab olaraq bildirilib ki, "Açıq Kommunal İnfrastruktur Proqramı II" layihəsi çərçivəsində şəhərin Natəvan qəsəbəsində işlər qismən icra olunub:
“Növbəti mərhələdə qəsəbənin bütün küçələrinə içməli su və çirkab su xətlərinin çəkilməsi nəzərdə tutulub. Layihə İri Şəhərlərin Birləşmiş Su Təchizatı Xidməti tərəfindən icra olunur və 2035-ci ilədək davam edəcək”.
