Gəncədə “Yaxşı idarəçilik güclü fəaliyyəti və dayanıqlı inkişafı təmin edir” mövzusunda beynəlxalq seminar keçirilib. Bu haqda bu gün, 1 mart tarixində Azərbaycan Respublikasının İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə istinadən xəbər veririk.
Seminar Böyük Britaniyanın Azərbaycan Respublikasındakı Səfirliyinin dəstəyi, Britaniya Standartları İnstitutu (BSİ) və Azərbaycan Standartlaşdırma İnstitutunun (AZSTAND) birgə təşkilatçılığı ilə baş tutub.
İki gün davam etmiş seminarda idarəetmə sahəsində ən yaxşı beynəlxalq təcrübələr, korporativ idarəetmənin əsas prinsipləri və elementləri, risk və imkanların təsnifatı nəzərdən keçirilib. Həmçinin iştirakçılar beynəlxalq standartlaşdırma təşkilatının (ISO) idarəetmə standartları, o cümlədən “ISO 37001 Rüşvətxorluğa qarşı idarəetmə sistemləri” standartı, performansın monitorinqi, ölçülməsi, biznes tərəfdaşlarının idarə edilməsi və digər mövzularda məlumatlandırılıb.
Seminarda Gəncə Şəhər İcra Hakimiyyəti, Gəncə şəhərində yerləşən müvafiq dövlət qurumları və özəl sektordan nümayəndələr iştirak ediblər.
