Gəncədə daha bir təhsil ocağının yanında zibillik əmələ gəlib.
Gencexeber.az məlumat verir ki, Gəncədə İsax Cəfərov, 29 ünvanında yerləşən 3 nömrəli körpələr evi-uşaq bağçasının yaxınlığında hökm sürən natəmizlik getdikcə narahatedici xarakter alır. Gündəlik antisanitar vəziyyət kifayət qədər tullantı qablarının olmamasından qaynaqlanır. Bağçadan 20-30 metr aralıda yerləşən qablar tullantıların həcminin öhdəsindən gələ bilmir və bu da zibillərin yığılmasına səbəb olur.
Sakinlər uşaqların sağlamlığına təhlükə yaradan bu haldan narazılıqlarını bildirirlər. Onların sözlərinə görə, həmin yerdə çürüyən zibil qoxusu həşərat və gəmiriciləri özünə cəlb edir.
Xatırladaq ki, sözügedən hal K.D.Uşinski adına 29 nömrəli tam orta məktəbin ətrafında da müşahidə olunub. Xəbər dərc edildikdən sonra aidiyyəti qurum ərazidə təmizlik işləri aparıb.
