Gəncədə bayramqabağı təmizlik işləri aparılıb. Bu haqda 29 dekabr tarixində Mənzil Kommunal Təsərrüfatı İstehsalat Birliyinə istinadən məlumat veririk.
Yeni ilin gəlişi və Dünya Azərbaycanlılarının Həmrəylik Günü münasibətilə "Təmiz şəhər" şüarı altında MKTİB tərəfindən şəhər ərazisində genişmiqyaslı təmizlik aksiyaları keçirilir. Qurumun canlı qüvvəsi və texnikası vasitəsilə şəhərin müxtəlif ərazilərində kompleks təmizlik işləri aparılıb, mövcud yaşıllığa qulluq göstərilib, ehtiyac olan yerlərə gül və dekorativ gül kolları əkilib.
Gəncəçay park - bulvar kompleksində təşkil olunan aksiyada ərazi məişət tullantıları, alaq otları, toz-torpaqdan təmizlənib. Məişət tullantılarının atılması üçün nəzərdə tutulan müxtəlif tutumlu konteynerlərin və zibil qutularının ətrafı yığışdırılıb. Yaşıllaşdırma şöbəsinin əməkdaşları ağacların və kolların budanma işlərini həyata keçirib, güldanlara yeni mövsümi güllər əkilib və oradakı bütün mövcud yaşıllıqlara aqrotexniki qulluq göstərilib. Təmir-Tikinti və Qəza xidməti şöbəsinin əməkdaşları tərəfindən isə park ərazisindəki səkilər, pilləkənlər və Bayraq meydanındakı atributlar toz-torpaqdan yuyularaq təmizlənib.
