Gədəbəydə kəndlərin birində yol infrastrukturunun salınmasına maneə törədilir.
Gencexeber.az Apa TV-yə istinadən məlumat verir ki, hadisə rayonun uzun illərdir yolsuzluqdan əziyyət çəkən Arıqıran kəndində baş verib.
Burada asfalt çəkmək üçün aidiyyəti qurumun əməkdaşları cəlb olunublar. Lakin kəndin ağsaqqallarından olan Səlim Tağıyev adlı molla yolu hasarla zəbt edib. Yolun genişlənməsi üçün bütün sakinlər həyətlərinin divarlarını sökərək yerini dəyişiblər. Onlar mollanı yola gətirməyə çalışsalar da, heç bir nəticə əldə edə bilməyiblər.
“İllərdir yolumuz yox idi. İndi şərait yaradırlar, asfalt çəkirlər, amma ağsaqqal heç cür razılığa gəlmir. Kəndin yaşlıları, xəstə olanları, uşaqları var. Palçıqda gedib-gəlirik, çox çətinlik çəkirik yolsuzluqdan”, – deyə sakinlər bildiriblər.
Əraziyə çəkiliş qrupu çağrılıb. Media əməkdaşlarını görən molla razılığa gəlib. Lakin onlar kəndi tərk edən kimi, hasarın sökülməsinə icazə verməyib.
Məsələ ilə bağlı Arıqıran kənd İcra nümayəndəliyi və bələdiyyəsinə müraciət olunub, lakin cavab alınmayıb. Rayon İcra Hakimiyyətindən isə bildirilib ki, problemlə bağlı kəndə yollanıblar, Səlim Tağıyevlə söhbətlər aparılıb amma heç bir nəticə əldə edilməyib.
