Amil Yunanov "Kəpəz"in heyətində onun üçün uğurlu olacağına inanır. Bu haqda məlumatı yanvarın 3-ü "Football-plus.az"a istinadən veririk.
Gəncə təmsilçisinin baş məşqçisi Adil Şükürov futbolçuya çox güvəndiyini və ümidlərini doğruldacağına inandığını deyib.
Amilin "Kəpəz"i seçməsini şərtləndirən səbəblərə gəldikdə o, belə cavab verib:
"Bəli, razılıq əldə olunub. İnşallah, qış fasiləsindən sonra "Kəpəz"in heyətində meydana çıxacam. İnanıram ki, keçidim həm mənim, həm də yeni komandam üçün uğurlu olacaq. Karyeramı "Səbail"də davam etdirmək yaxşı alınmırdı. Çünki əsasən, 80-ci dəqiqədən sonra oyuna daxil olurdum. Ehtiyat oyunçular skamyasında vaxt keçirməyin nə mənası var ki?! Bunun mənim üçün heç bir xeyri yox idi. Bununla yanaşı, "Səbail"in istər çempionluğa, istərsə də avrokuboklara iddialı olmasının fərqi yoxdur. Sabiq komandama uğurlar arzulayıram. İnşallah, istəklərinə çatarlar. Məncə, bütün futbolçular hər vəziyyətdə özünü, gələcəyini düşünməlidir. Bundan sonra bütün fikrimi "Kəpəz"ə yönəldəcəyəm".
