Gəncədə növbəti təlim baş tutub. Bu haqda 1 dekabr tarixində ADAU-ya istinadən məlumat veririk.
Fövqəladə Hallar Nazirliyinin Gəncə Regional Mərkəzinin əməkdaşları Azərbaycan Dövlət Aqrar Universitetində (ADAU) əməkdaşlar və tələbələrlə görüşüblər. Burada təlim keçirilib.
Tədbirin birinci hissəsində çıxış edən rektor Zəfər Qurbanov həm əməkdaşların, həm də tələbələrin fövqəladə hallar zamanı məlumatlı olması və çevik reaksiya verə bilməsi üçün bu cür təlimlərin vacibliyini diqqətə çatdırıb. O, fövqəladə hallar zamanı birgə fəaliyyətin və əməkdaşlığın təhlükəsizliyinin təmin olunması istiqamətində mühüm rol oynadığını vurğulayıb.
Mülki müdafiəyə hazırlıq şöbəsinin rəisi, polkovnik-leytenant Bəhayi Nəsirov tədbir iştirakçılarına əhalinin mühafizəsinin əsas prinsipləri, əhalinin və ərazinin mühəndis, radiasiya və kimya mühafizəsi, əhalinin köçürülməsi və fövqəladə hallar haqqında xəbərdar edilmə mövzularında ətraflı məlumat verib.
Təlimin ikinci hissəsində xilasedicilər şərti qəza baş vermiş “hündürmərtəbəli bina”da əməliyyat şəraitinə uyğun olaraq, operativ kəşfiyyat işləri aparmaqla aşkar olunmuş “zərərçəkmişləri” təxliyə edib, onlara “təxirəsalınmaz ilkin tibbi yardım göstərib”, həmçinin qarşıya qoyulmuş digər tapşırıqları uğurla icra ediblər.
Sonda FHN-in Gəncə Regional Mərkəzinin xilasetmə texnikaları və avadanlıqları tədbir iştirakçılarına nümayiş olunub.
