Gəncədə küçələrdən biri baxımsız qalıb.
Gencexeber.az-ın məlumatına görə, şəhərin Təbriz küçəsi 9-cu döngə sakinləri uzun illərdir ki, zəruri infrastrukturun olmamasından əziyyət çəkirlər. Onların sözlərinə görə, bu illər ərazidə heç bir asfaltlanma, işıqlandırma və kanalizasiya işləri aparılmayıb.
Küçəyə axıdılan çirkab suları səbəbindən ətraf üfunət qoxur və bu da 50-dən çox ailənin yaşadığı ərazidə həyatı dözülməz edir. Sakinlər bildirib ki, axşam saatlarında yalnız fənər işığı ilə hərəkət etmək mümkün olur:
“Avtomobillərdən qalxan toz adamın nəfəsinə dolur. Yağışlı havalarda vəziyyət daha da pisləşir. Bu küçədə yaşamaq mümkün deyil. Dəhşətli qoxuya və dəhşətli şəraitə dözürük. Burada yağışlardan sonra iri gölməçələr yaranır, ərazi palçıq içində batır. Uşaqları çöldə oynamağa belə buraxa bilmirik”, – deyə sakinlərdən biri deyib.
Yerli sakinlər rəsmiləri bu problemə diqqət yetirməyə və küçədə yaşayış şəraitinin yaxşılaşdırılması üçün tədbirlər görməyə çağırırlar.
