Gəncədə bir sıra küçələrdə asfalt örtüyü yoxdur və ya dağılıb. Bu haqda Gencexeber.az-a 12 iyun tarixində məlumat daxil olub.
Bu hal şəhərin Gülüstan qəsəbəsindəki Aydın Nəbiyev, Azərbaycan Bayrağı və Adil İsgəndərov küçələrini birləşdirən 2 və 3-cü döngələr, 26 nömrəli uşaq bağçası olan Seyid Əzim Şirvani, Ozan, Nuru Paşa, Gürcüstanın Gəncədəki Baş Konsulluğu yerləşən Həsən Əliyev və Faiq Bayramov küçələrində müşahidə olunur. Burada əksər ərazilərdə asfalt örtüyü yoxdur, bir qismində isə yarğanlar yaranıb.
Sakinlərin sözlərinə görə, bəzi küçələrə taksi, təcili tibbi yardım və yanğınsöndürən avtomobillər girə bilmir. Həmçinin Seyid Əzim Şirvani küçəsində yaşayan əhali yeni kanalizasiya sisteminin çəkilməməsindən narazıdır.
Bundan başqa, Kimyaçılar və Azərbaycan bayrağı küçələrinin kəsişməsində kanalizasiya quyusunun ətrafında asfalt örtüyü dağılıb. Nəticədə avtomobil yolunun mərkəzində yarğan əmələ gəlib.
Sakinlər sözügedən ərazilərə asfalt örtüyünün çəkilməsini arzu edirlər.
[modula id="38907"]
