Gəncədə sərgi baş tutacaq.
Gencexeber.az Ekologiya və Təbii Sərvətlər Nazirliyinə istinadən məlumat verir ki, “Azərbaycanın milli parklarının tanıtımı” sərgisi təşkil olunacaq. Tədbir bu gün, sentyabrın 30-u saat 14:00-da Mərkəzi meydanda (Filarmoniya bağının yanı) keçiriləcək.
"Biomüxtəliflik-təbiətin harmoniyası" devizi altında baş tutacaq yığıncaqda vətəndaşlar milli parkların tanıtımını əks etdirən stendləri gəzərək ölkəmizdəki milli parklarla virtual tanışlıq imkanı qazanacaqlar. Burada milli parklarda fəaliyyət göstərən ekoturizm marşrutları, xüsusi mühafizə olunan təbiət ərazilərinin flora və faunasına aid tanışlıq guşələri yer alacaq, həmçinin ziyarətçilərə milli parklarda asudə vaxtlarını necə maraqlı keçirə biləcəkləri haqqında məlumat veriləcək.
Eyni zamanda, tədbirdə interaktiv zona yaradılacaq, Gəncə şəhər Mədəniyyət İdarəsinin dəstəyi ilə gənc rəssamlar milli parklara aid rəsmlər çəkəcək, iştirakçılar arasında ekoviktorina təşkil olunacaq.
Görüşdə həmçinin Göygöl Milli Parkına dair film, canlı musiqi, uşaq ansamblının ifasında milli rəqslər nümayiş ediləcək.
