Bu gün şəhidlər Qurban Qurbanov, Ruslan Abdullayev və Hüseyn Quliyevin doğum günüdür.
Qurban Əvəz oğlu Qurbanov 4 mart 1974-cü ildə Gəncədə anadan olub. Orta təhsilini 9 saylı orta məktəbdə alıb. Məktəbi bitirdikdən sonra Gəncə Dövlət Pedaqoji İnstitutuna daxil olub. Onun yaxın qohumları 1992-ci il fevral ayının 26-da törədilən Xocalı faciəsinin qurbanları olmuşdular.
15 iyun 1992-ci ildə o, könüllü olaraq hərbi xidmətə yollanıb. Qurbanın son döyüşü Səfyan-Güləbird istiqamətində olub. Qurbanov Qurban Əvəz oğlu 19 oktyabr 1992-ci ildə Qubadlı uğrunda gedən qanlı döyüşdə yaralanıb. Tibb məntəqəsinə gətirilsə də, həkimlərin səylərinə baxmayaraq, o, dünyasını dəyişib.
Ruslan Ələnşir oğlu Abdullayev 4 mart 1968-ci ildə anadan olub. Orta məktəbin 8-ci sinfini bitirdikdən sonra təhsilini 9 №-li texniki-peşə məktəbində davam etdirib. 1988-1990-cı illərdə Kominka şəhərində hərbi xidmətdə olub. 10 mart 1992-ci ildə Özünümüdafiə Batalyonunda xidmət etməyə başlayıb.
Abdullayev Ruslan Ələnşir oğlu 1992-ci ildə kəşfiyyat zamanı Tərtər bölgəsində şəhidlik zirvəsinə ucalıb.
Hüseyn Həsən oğlu Quliyev 4 mart 1999-cu ildə Gəncədə anadan olub. 2016-cı ildə 4 nömrəli tam orta məktəbi bitirib. Həmin ildə Bakı Dövlət Universitetinin Tarix fakültəsinə qəbul olub və 2020-ci ildə təhsilini başa vurub.
2020-ci ildə həqiqi hərbi xidmətə çağırılıb. Quliyev Hüseyn Həsən oğlu 28 sentyabr 2020-ci ildə Murovdağ istiqamətində gedən döyüşdə şəhidlik zirvəsinə ucalıb. 3 oktyabrda isə Gəncə şəhərinin Şəhidlər xiyabanında torpağa tapşırılıb.
