11 mart şəhidimiz İlqar Bürcəliyevin anadan olduğu gündür.
Bürcəliyev İlqar Vüqar oğlu 11 mart 2001-ci ildə Rusiya Federasiyasının Moskva şəhərində doğulub. 2007-2009-cu illərdə Xırdalan şəhərinin 2 nömrəli tam orta məktəbində, 2009-2016-cı illərdə Yasamal rayonunun Ə.Əhmədov adına 308 nömrəli tam orta məktəbində, 2016-2018-ci illərdə Gəncə şəhərinin 38 nömrəli tam orta məktəbində, 2018-ci ildə isə Yasamal rayonunun Ə.Əhmədov adına 308 nömrəli tam orta məktəbində təhsil alıb.
İlqar Bürcəliyev 2014-2016-cı illərdə "Vətən" Futbol Klubunda, 2016-cı ildə "Kəpəz" PFK-da, 2016-cı ildən isə "Zirə" PFK-da çıxış edib. 2017-ci ildən 18 yaşlılardan ibarət Azərbaycan yığmasının heyətində çıxış edirdi.
İlqar Bürcəliyev görkəmli teatr və kino xadimləri, Azərbaycan SSR Xalq artistləri Məmməd Bürcəliyevin və Sədayə Mustafayevanın nəticəsidir.
İgidimiz İlqar Bürcəliyev 2020-ci il sentyabrın 27-də başlanan Vətən müharibəsi zamanı Tərtər rayonunun Suqovuşan kəndi istiqamətində gedən döyüşlərdə iştirak edib. 28 sentyabr 2020-ci il tarixində Tərtər rayonunun azadlığı uğrunda gedən döyüşlər zamanı şəhadətə ucalıb.
29 sentyabr 2020-ci il tarixində Gəncə şəhərinin Şəhidlər xiyabanında dəfn olunub.
Bürcəliyev İlqar Vüqar oğlu ölümündən sonra "Vətən uğrunda" və "Laçının azad olunmasına görə" medalları ilə təltif edilib.
