Gəncədə şagirdlər üçün layihə start götürür. Bu haqda 8 mart tarixində Təhsil İnstitutuna istinadən məlumat veririk.
Rəqəmsal İnkişaf və Nəqliyyat Nazirliyinin təşəbbüsü ilə İnnovasiyalar və Rəqəmsal İnkişaf Agentliyinin nəzdində “Technest” təqaüd proqramı yaradılıb. Məqsəd ölkədə İKT sahəsində kadr bankının yaradılması prosesinə töhfə vermək və əmək bazarındakı kadr ehtiyaclarını qarşılamaqdır.
Bu səbəbdən Gəncədə 8-ci sinif şagirdlərinin riyaziyyat və informatika olimpiadalarına olan marağının artırılması, eləcə də proqramlaşdırma bacarıqlarının inkişaf etdirilməsi məqsədilə təqaüd proqramı elan edilir. Proyekt İnnovasiyalar və Rəqəmsal İnkişaf Agentliyi və Elm və Təhsil Nazirliyinin birbaşa tabeliyində olan liseylərlə birgə həyata keçiriləcək.
Təqaüd qazanan şagirdlər pulsuz olimpiada dərslərinə cəlb olunacaqlar. Layihəyə qatılmaq üçün www.olimpiada.edu.az saytında qeydiyyatdan keçmək lazımdır.
