Beynəlxalq Yaşıl STEAM Azərbaycan Festivalında Gəncə-Daşkəsən iqtisadi rayonundan (İR) 12 komanda iştirak edəcək.
Gencexeber.az-a bu barədə Gəncə - Daşkəsən Regional Təhsil İdarəsindən məlumat verilib.
Bildirilib ki, Gəncə şəhər Fizika, riyaziyyat və informatika təmayüllü liseyin, Gəncə şəhər 4, 5, 13, 17, 26 və 27 nömrəli tam orta məktəblərin, Daşkəsən rayon İ.Nəsimi adına 1 nömrəli tam orta məktəbin və Samux rayon İnstitut qəsəbə tam orta məktəbin müəllim və şagirdlərindən ibarət "SAF VEX V5", "Eco Coding", "Fly Tech", "SAF H2", "Engineers of Future", "Yaşıl təşəbbüslər", "Cube Sat", və "VİDX” komandaları Beynəlxalq Yaşıl STEAM Azərbaycan Festivalının final mərhələsində iştirak edəcəklər.
Komandalar Gəncə STEAM Mərkəzində Beynəlxalq Yaşıl STEAM Azərbaycan Festivalına hazırlaşırlar.
Festivalın keçirilməsində məqsəd STEAM əsaslı tədrisin təşviqi, təhsilalanlar arasında XXI əsr bacarıqlarının inkişaf etdirilməsi, yaradıcı təhsilalanların aşkara çıxarılması, eləcə də BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP 29) Azərbaycanda keçirilməsi və 2024-cü ilin ölkəmizdə “Yaşıl dünya naminə həmrəylik ili” elan edilməsi ilə əlaqədar STEAM əsaslı yanaşmanın tətbiqi ilə ətraf mühitin sağlamlaşdırılması, su ehtiyatlarından və alternativ enerji mənbələrindən səmərəli istifadəyə dair innovativ həll və layihələrin hazırlanmasının təşviq edilməsidir.
