Gəncədə Avropa çempionunu qarşılama mərasimi keçirilib. Bu haqda 26 iyun tarixində Gənclər və İdman Baş idarəsinə istinadən məlumat veririk.
Albaniyanın paytaxtı Tiranada keçirilən U-17 Avropa çempionatının qalibi Camal Abbasov doğma Vətənə qayıtması münasibətilə Heydər Əliyev Park-kompleksinin girişindəki Zəfər Tağının önündə təntənəli qarşılanıb. Mərasimdə Gənclər və İdman Baş İdarəsinin rəisi Həmid Nəsirov, 1 nömrəli Uşaq-Gənclər İdman Məktəbinin direktoru Ramil Qasımov, həmçinin şəhərin idman ictimaiyyətinin nümayəndələri iştirak ediblər.
Tədbirdə Həmid Nəsirov çıxış edərək, C.Abbasovu Avropa çempionatının qalibi olması münasibətilə təbrik edib və ona gələcək yarışlarda uğurlar arzulayıb. Şəhərin idman ictimaiyyətinin nümayəndələri də gənc idmançımızın uğuruna sevindiklərini və gələcəkdə bundan da böyük qələbələr qazanacağına əmin olduqlarını bildiriblər.
