Gəncədə universitetlərdən birində görüş keçirilib. Bu haqda 27 dekabr tarixində ADAU-ya istinadən məlumat veririk.
Tədbir Kənd Təsərrüfatı Nazirliyi tərəfindən “Paşa Holdinq”in dəstəyi ilə həyata keçirilən Aqrar Fəaliyyətli Azərbaycan Qadınları (AFAQ) layihəsi çərçivəsində baş tutub. Azərbaycan Dövlət Aqrar Universitetinin müəllim və tələbələri ilə görüş təşkil olunub.
Öncə universitetin pedaqoji heyətinə AFAQ layihəsi haqda məlumat verilib, əməkdaşlıqların ilkin istiqamətləri üzrə birgə fəaliyyət üçün danışıqlar aparılıb. Sonra tələbələrlə görüş keçirilib.
Tədbirdə layihənin gənclər üçün üstünlükləri vurğulanıb, gələcəkdə proyektə qoşulacaq gənclərə biznes ideyalarının reallaşdırılması üçün müxtəlif istiqamətlər - konsultasiya, bilik və bacarıqlarının artırılması, marketinq və texniki dəstəyin göstəriləcəyi bildirilib. Bildirilib ki, layihə gənclərin məşğulluq və sahibkarlıq fəaliyyətlərini artıracaq, yaradıcı və innovativ potensiallarının üzə çıxarılmasına dəstək göstərəcək.
Görüş zamanı tələbələrin sualları cavablandırılıb, onların təklifləri dinlənilib.
