Gəncədə beynəlxalq tədbir keçirilib. Bu haqda 9 iyun tarixində İcra Hakimiyyətinə istinadən məlumat veririk.
"Yenidənqurma, sülh və inteqrasiya: Enerji, iqtisadiyyat, ətraf mühit və kapital" mövzusunda tədbir Nizami Gəncəvi Beynəlxalq Mərkəzi tərəfindən təşkil olunub. Tədbirdə Mərkəzin həmsədri İsmayıl Seragəldin, icra başçısı Niyazi Bayramov, müxtəlif ölkələrin 30-dan çox sabiq prezidenti, baş naziri və digər rəsmi qonaqlar iştirak ediblər. Əvvəlcə Nizami Gəncəvinin Məqbərəsi ziyarət olunub.
Daha sonra qonaqlar Gəncə Dövlət Filarmoniyasının önündə Gəncə Dövlət Dram Teatrının təqdimatında “Xəmsə” adlı ədəbi-bədii kompozisiyaya tamaşa ediblər. Filarmoniyanın solisti Elmir Pişnamazzadənin ifasında dahi şairin sözlərinə bəstələnmiş əsərlər səslənib, Göygöl Mahnı və Rəqs Ansamblının təqdimatında “Odlar yurdu” kompozisiyası təqdim olunub.
Bədii hissədən sonra Mərkəzin adını daşıdığı dahi Azərbaycan şairi və mütəfəkkiri Nizami Gəncəvinin irsində yer alan dəyərlərin tədqiqi və təbliği istiqamətində keçirilən toplantının rəsmi hissəsi başlayıb. Niyazi Bayramov Gəncənin tarixi, mədəniyyəti və digər sahələri barədə geniş məlumat verib. Çıxış edən qonaqlar Nizami Gəncəvinin əsərlərini, xüsusən “Xəmsə”ni dünya ədəbiyyatının xəzinəsi adlandırıblar.
Tədbirin sonunda qarşılıqlı hədiyyələr təqdim olunub, xatirə şəkli çəkdirilib.
