Övladı narahatlıq keçirən valideyn üçün həmin an dünyada ən vacib məsələ yalnız onun sağalmasıdır. Belə məqamlarda valideynin ümidlə üz tutduğu ünvan uşaq həkimidir. Gəncə səhiyyəsində artıq 46 ildir uşaqların sağlamlığının keşiyində dayanan Rizvan Əsgərov da ömrünün böyük hissəsini məhz bu məsuliyyətli sənətə həsr edib.
Rizvan Əsgərov 1974-cü ildə Azərbaycan Tibb Universitetinə qəbul olunub. 1980-ci ildə ali təhsilini pediatr ixtisası üzrə başa vurduqdan sonra əmək fəaliyyətinə Göygöl rayonunda başlayıb. 1992-ci ildən Gəncə Şəhər Birləşmiş Xəstəxanasının nəzdində olan Akademik Z.Məmmədov adına xəstəxananın Pediatriya şöbəsinə rəhbərlik edir.
Rizvan Əsgərov işə başladığı illərlə bugünkü tibb arasında müqayisə aparmağın çətin olduğunu deyir:
"Fəaliyyətə başladığım dövrlə indiki arasında dağlar qədər fərq var. Düzgün diaqnoz təyin etmək çətin olurdu, çox əziyyət çəkirdik, bəzən terapiya da effekt vermirdi. İndi gənc kadrlarımız müasir metodlardan və texnikadan istifadə etməklə ən ağır halların öhdəsindən gələ bilirlər".
İllər, onilliklər dəyişsə də, dəyişməyən bir şey var: mütəxəssisin üzərinə düşən məsuliyyət. Pediatrın fikrincə, uşağı sağaltmaq yalnız tibbi prosedurları yerinə yetirməkdən ibarət deyil.
Qeyd edək ki, Rizvan Əsgərov Azərbaycanın Tehrandakı səfirliyinə edilən terror hücumu zamanı diplomatik nünayəndəliyimizin şəhid olan mühafizə xidmətinin rəisi Orxan Əsgərovun atasıdır. Bu fakt onun həyat hekayəsinə tamam başqa bir məna qatır: bir tərəfdə illər boyu uşaqların həyatını xilas edən təbib, digər tərəfdə isə səfirliyimizin təhlükəsizliyi naminə canından keçən oğul.
Qocaman pediatr sonda bildirib ki, uşaqların sağlam böyüməsində böyüklərin nəzarəti mühüm rol oynayır: "Valideynlərə tövsiyəm odur ki, övladlarını smartfon və digər zərərli texnologiyalardan maksimum uzaq tutsunlar.
Mənbə: AZƏRTAC
