Beynəlxalq təşkilatın nümayəndələri Gəncəyə səfər ediblər. Bu haqda 4 avqust tarixində Report-a istinadən məlumat veririk.
İslam Əməkdaşlıq Təşkilatının Müstəqil Daimi İnsan Hüquqları Komissiyasının (İƏT MDİHK) sədri Muhammad Laval Sulaimanın rəhbərlik etdiyi nümayəndə heyəti Nizami yurduna baş çəkib. Qonaqlar 44 günlük müharibə dövründə beynəlxalq humanitar hüququn qaydalarına zidd olaraq, yaşayış məntəqələrinin atəşə tutulması faktları ilə yerində tanış olublar.
Nümayəndə heyətinin üzvləri raket hücumları nəticəsində zərərçəkmiş sakinlərlə görüşüblər. Qonaqlara İkinci Qarabağ müharibəsi zamanı Ermənistan tərəfindən qadağan olunmuş silahlardan istifadə etməklə, mülki əhaliyə qarşı törədilmiş, çoxsaylı insan tələfatı və ciddi dağıntılarla nəticələnən müharibə cinayətləri barədə məlumat verilib.
Daha sonra nümayəndə heyəti Ermənistan silahlı qüvvələrinin raket hücumları nəticəsində zərər dəymiş “İmamzadə" Ziyarətgah Kompleksində yerində monitorinq aparıb.
