Gəncədə vətəndaş qəbulu keçirilib. Bu haqda 23 iyun tarixində TƏBİB-ə istinadən məlumat veririk.
Tibbi Ərazi Bölmələrini İdarəetmə Birliyinin (TƏBİB) Müşahidə Şurasının sədri, İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev, TƏBİB-nin İcraçı direktoru Vüqar Qurbanov Şəhər Birləşmiş Xəstəxanasında Gəncə, Samux və Kəlbəcər rayon sakinlərini qəbul ediblər.
Tədbirə Agentliyin İdarə Heyəti sədrinin müavini Nigar Bayramova, Gəncə, Samux və Kəlbəcər rayon mərkəzi xəstəxanalarının direktorları və Gəncə filialının rəhbəri qatılıb. Qəbulda 40 vətəndaşın müraciətinə baxılıb.
Müraciətlər, əsasən, müayinə-müalicə, cərrahi əməliyyatlar, icbari tibbi sığorta çərçivəsində ixtisaslaşdırılmış tibb müəssisələrinə göndəriş vərəqələrinin verilməsi, dərman təminatı, əlillik məsələləri, iş və əmək münasibətləri ilə bağlı olub.
Bir sıra məsələlər yerində həll edilib. Digər müraciətlərin araşdırılması və qanunvericiliyə uyğun baxılması məqsədilə müvafiq tapşırıqlar verilib.
