Gəncədə qonşusunun evindən geyimlər və müxtəlif məişət əşyaları oğurlayan şəxs məhkəmə qarşısına çıxarılıb.
Gencexeber.az-ın əldə etdiyi məlumata görə, hadisə şəhərin 2-ci mikrorayon ərazisində baş verib.
İş materiallarına əsasən, təqsirləndirilən Vahid sərxoş vəziyyətdə tamah niyyəti ilə zərərçəkmişə məxsus mənzilə gecə saatlarında pəncərədən daxil olub. O, evdən ümumi dəyəri 1520 manat olan qadın və kişi ayaqqabıları, qadın gödəkçəsi, xalçalar, ədyal, iki ədəd divan yastıqları, elektrikli üzqırxan, saç feni, büllur stəkan və bir ədəd stul oğurlayıb.
Məhkəmədə ifadə verən təqsirləndirilən şəxs ittiham üzrə özünü qismən təqsirli bildiyini deyib. O bildirib ki, mənzildən stul, divan yastıqları, saç feni, çaydan, elektrikli üzqırxan, xalçalar, ədyal, büllur qablar və bir cüt kişi ayaqqabısı götürüb. Lakin ittiham aktında göstərilən qadın gödəkçəsini, iki cüt qadın ayaqqabısını və digər iki cüt kişi ayaqqabısını oğurlamadığını iddia edib.
Təqsirləndirilən şəxs oğurladığı əşyaları öz mənzilində saxladığını, hadisəni tək törətdiyini və bu barədə heç kimin məlumatının olmadığını qeyd edib. O, əməlindən peşman olduğunu bildirərək məhkəmədən barəsində yüngül cəza təyin edilməsini xahiş edib.
Zərərçəkmiş Cavidan isə ifadəsində bildirib ki, həyat yoldaşı ilə birlikdə bir neçə gün müddətində Bakı şəhərində təhsil alan övladlarının yanına gedib. Evə qayıtdıqda mənzilin pəncərəsinin zorla açıldığını görərək oğurluq hadisəsinin baş verdiyini anlayıb.
Onun sözlərinə görə, evdə apardığı yoxlama zamanı çoxsaylı əşyaların oğurlandığı məlum olub. Bundan sonra o, Daxili İşlər Nazirliyinin "102" xidmətinə məlumat verib.
Zərərçəkmiş şəxs məhkəmədə bildirib ki, oğurlanmış əşyaların bir hissəsi geri qaytarılsa da, qadın gödəkçəsi, iki cüt qadın ayaqqabısı və iki cüt kişi ayaqqabısı tapılmayıb. Bu səbəbdən ona vurulmuş maddi ziyanın tam ödənilmədiyini qeyd edən zərərçəkmiş şəxs təqsirləndirilən şəxslə barışmadığını və onun ciddi şəkildə cəzalandırılmasını istəyib.
Gəncə Şəhər Məhkəməsinin hökmü ilə Vahid Cinayət Məcəlləsinin yaşayış sahəsinə qanunsuz daxil olmaqla oğurluq maddəsi ilə təqsirli bilinib və 3 il müddətinə azadlıqdan məhrumetmə cəzasına məhkum edilib.
Qeyd edək ki, adlar şərti verilib.
Əsmər Sənani
